"Yuventus" bu məşhur geyim brendi ilə əməkdaşlıq edəcək

İtaliyanın "Yuventus" klubu geyim və müxtəlif aksesuarların istehsalı və ticarəti üzrə ixtisaslaşan yerli "Giorgio Armani" şirkəti ilə əməkdaşlığa razılaşıb.

90deqiqe.Az-ın məlumatına görə, bu barədə klubun rəsmi saytı məlumat yayıb.

"Futbol dünyası ilə əlaqələrini inkişaf etdirən "Giorgio Armani" ilk dəfə olaraq "Yuventus"un rəsmi qarderobunu dizayn edib. Əməkdaşlığa 2025/2026 və 2026/2027 mövsümlərində meydandan kənar bütün rəsmi tədbirlər üçün əsas kişi komandanın oyunçuları üçün yaradılmış Giorgio Armani kostyumlarının kolleksiyası daxildir.

Bütün milli və Avropa yarışları üçün nəzərdə tutulmuş qarderob hamar xətlər, incə detallar, yüksək keyfiyyətli materiallar və "Giorgio Armani" stilini müəyyən edən ikonik sürməyi rəngə əsaslanan rəng palitrası sayəsində incəlik və müasir rahatlığı özündə birləşdirir”, - klubun açıqlamasında bildirilir.