“Napoli” A Seriyaya qələbə ilə başladı

İtaliya A Seriyasının I turu çərçivəsində keçirilən “Sassuolo” – “Napoli” oyunu başa çatıb.

90deqiqe.Az-ın məlumatına görə, “Mapei – Citta del Tricolore” stadionunda baş tutan qarşılaşmada qonaqlar 2:0 hesabı ilə qalib gəlib.

Matçın baş hakimi Covanni Ayroldi olub.

Neapol təmsilçisini qələbəyə daşıyan qolları 17-ci dəqiqədə şotlandiyalı yarımmüdafiəçi Skott Maktominay və 57-ci dəqiqədə yeni transfer – belçikalı ulduz Kevin De Bruyne vurub. De Bruyne bu oyunda “Napoli” forması ilə debüt qolunu qeyd edib.

Qeyd edək ki, meydan sahibləri 79-cu dəqiqədən etibarən azlıqda oynayıb. “Sassuolo”nun yarımmüdafiəçisi İsmayıl Kone birbaşa qırmızı vərəqə alaraq meydandan qovulub.

Növbəti turda “Napoli” doğma meydanda “Kalyari” ilə qarşılaşacaq. “Sassuolo” isə səfərdə “Kremoneze”nin qonağı olacaq.