“Latsio” “Verona” səfərindən minimal qələbə ilə döndü

İtaliya A Seriyasının 20-ci turu çərçivəsində “Verona” və “Latsio” komandaları bərabər mübarizə aparıblar.

90deqiqe.Az-ın məlumatına görə, qonaqlar topa nəzarətdə üstünlük qazansalar da, oyun ümumilikdə balanslı keçib.

Matçın 5-ci dəqiqəsində Tidjani Noslin hesabı açmaq üçün yaxşı şans əldə etsə də, baş zərbəsi qapı dirəyinin yanından keçib. İkinci hissədə Adam Maruşiç cərimə zərbəsindən təhlükəli zərbə endirib, lakin qapıçı vaxtında reaksiya verərək komandasını xilas edib.

Görüşün taleyini 79-cu dəqiqədə vurulan avtoqol həll edib. Viktor Nels­son Manuel Latsarinin zərbəsini uğursuz bloklayaraq topu öz qapısına göndərib — 0:1. Matçın sonlarında Amin Sarr başla zərbə endirsə də, top rəqibə dəyib. Epizodun davamında Nels­sonun təkrar zərbəsi dəqiq olmayıb.

Bu nəticə ilə “Latsio” turnir cədvəlində səkkizinci pilləyə yüksəlib. “Verona” isə xallarını artıra bilməyərək sonuncu yerləri digər komandalarla bölüşür.