“Spaletti və Alleqri – hər ikisi böyük məşqçidir”

“Yuventus”un müdafiəçisi Qleyson Bremer klubun hazırkı baş məşqçisi Lusiano Spalletti ilə əvvəlki çalışdırıcı Massimiliano Alleqrini müqayisə edib.

90deqiqe.Az-ın məlumatına görə, braziliyalı futbolçu bildirib ki, hər iki mütəxəssis yüksək səviyyəli məşqçidir:

“Alleqri ilə işləmək çox yaxşı idi, uzun fasilədən sonra qalibiyyətlərə qayıtdıq. Ondan xüsusilə müdafiə oyununda çox şey öyrəndim. Spaletti isə hər zaman oyuna nəzarət etməyə və hücum futbolu oynamağa üstünlük verir. Biz də hər matçda bunu etməyə çalışırıq”.

Bremer 2022-ci ildə “Torino”dan “Yuventus”a 51 milyon avro qarşılığında transfer olunub. Onun klubla müqaviləsi 30 iyun 2029-cu ilədək qüvvədədir.

Cari mövsümdə braziliyalı müdafiəçi 27 oyunda 4 qol vurub və 3 məhsuldar ötürmə ilə yadda qalıb.