“Latsio” Sarriyə əvəzləyici tapıb

“Latsio” İtaliya Kubokunun finalına yüksəlsə də, İtaliya çempionatını 9-cu yerdən yuxarıda bitirə bilməyəcək.

90deqiqe.Az xəbər verir ki,  Roma derbisindəki son məğlubiyyətdən sonra baş məşqçi Mauritsio Sarri açıq şəkildə klub rəhbərliyindən dəstək görmədiyini bildirib. Bu isə onun yaxın zamanda vəzifəsindən ayrılması ilə bağlı müzakirələri gücləndirib.

Sarriyə mümkün əvəzləyici kimi “Latsio”nun sabiq futbolçusu Miroslav Kloze göstərilir. Alman hücumçu 2011–2016-cı illərdə Roma klubunun formasını geyinib və İtaliya A seriyasında keçirdiyi 139 oyunda 54 qol vuraraq azarkeşlərin sevimlisinə çevrilib.

Kloze məşqçilik karyerasına Avstriyada başlayıb, daha sonra “Nürnberq” klubuna rəhbərlik edib. Onun rəhbərliyi altında komanda Almaniyanın ikinci Bundesliqasında turnir cədvəlində yüksəliş əldə edib, gənc futbolçularla işi isə yüksək qiymətləndirilib. Məlumata görə, klub bu dövrdə perspektivli oyunçuların satışından əhəmiyyətli gəlir əldə edib.

“Latsio” prezidenti Klaudio Lotito Kloze ilə yaxından tanışdır və onun işini yüksək qiymətləndirir. Yaxın günlərdə Lotito Sarrinin gələcəyi ilə bağlı qərarı dəqiqləşdirmək üçün onunla görüş keçirməlidir. Bundan sonra Roma klubunun məşqçi heyətinin taleyi daha aydın olacaq.