“Latsio”nun iki müdafiəçisi üç həftə yaşıl meydanlardan uzaq qalacaq

İtaliyanın “Latsio” klubunun müdafiəçiləri Nunu Tavares və Yosip Şutalo əzələ zədələri səbəbindən ən azı üç həftə yaşıl meydanlardan kənarda qalacaqlar.

90deqiqe.Az-ın “Football Italia”ya istinadən məlumatına görə, hər iki futbolçu ötən bazar günü “Napoli” ilə keçirilən və 1:1 hesabı ilə başa çatan oyunda zədələnib. Bu səbəbdən onlar müvafiq olaraq Portuqaliya və Xorvatiya milli komandalarının düşərgəsini tərk ediblər.

Gözlənilir ki, Tavares və Şutalo A Seriyasında “Leççe” və “Torino” ilə matçları buraxacaqlar. Klub rəhbərliyi müdafiəçilərin dekabrın ilk həftəsində sıraya qayıdacağına ümid edir.

Qeyd edək ki, Nunu Tavares cari mövsümdə A Seriyasında 11 oyunda iştirak edib, bir qol vurub və dörd məhsuldar ötürmə verib. Şutalo isə çempionatda səkkiz matça çıxıb. Hər iki futbolçu hələlik sarı və ya qırmızı vərəqə almayıb.