Ronaldo növbəti dəfə əvəzlənməsinə etiraz etdi - VİDEO

“Yuventus”un baş məşqçisi Mauritsio Sarri A Seriyasının 12-ci turunda evdə “Milan”a 1:0 hesabı ilə qalib gəldikləri oyunda Kriştiano Ronaldonu əvəzləməsinə aydınlıq gətirib.

Corner.az xəbər verir ki, italiyalı mütəxəssis matçın 55-ci dəqiqəsində portuqaliyalı hücumçunun yerinə qələbə qolunu vuran Paulo Dibalanı buraxmasını belə şərh edib: “Ronaldo oynamaq üçün əlindən gələni etdi. Ancaq gördüm ki, özünü yaxşı hiss etmir və onu əvəzləməyin daha yaxşı olacağını düşündüm. Ən yaxşısını ortaya qoyan bütün futbolçular əvəzləndiyi zaman əsəbləşir”.

Sarri ardıcıl ikinci oyunda Ronaldonu əvəzləyib. O, Çempionlar Liqasının qrup mərhələsinin IV turunda “Lokomotiv”i 2:1 hesabı ilə məğlub etdikləri oyunun 82-ci dəqiqəsində Ronaldonu əvəzləmişdi.

Portuqaliyalı futbolçu hər iki halda əvəzlənməsindən narazı qalıb. O, “Lokomotiv”lə matçda baş məşqçinin əlini sıxmayıb, “Milan”la dueldə isə birbaşa paltardəyişmə otağına gedib.

Qeyd edək ki, Ronaldo sonuncu dəfə 2016-cı ilin mayında ardıcıl 2 oyunda əvəzlənib. O, ötən mövsüm cəmi 2 dəfə yerini komanda yoldaşına verib.