“Qarabağ”ın Avropa Konfrans Liqasının pley-off mərhələsindəki rəqibi “Gent” satışa çıxarılıb. Corner.az xəbər verir ki, bu barədə Belçika klubunun mətbuat xidməti məlumat yayıb.
Məlumatda, bunun klubun tam satışı yox, sadəcə, yeni investisiyalar cəlb edilməsi üçün atılmış bir addım olduğu vurğulanıb. Lakin istənilən halda “Gent” azarkeşləri bu xəbərdən narahat olmağa başlayıblar. Onlar bu klubun kənar şəxslərin əlinə keçməsini istəmirlər.
“Gent”in azarkeşlər federasiyasının sədri Filip Raes bu məsələ ilə bağlı yerli mətbuata narahatlığını belə bildirib: “Biz klubun gələcəyinə mümkün qədər tez aydınlıq gətirilməsini istəyirik. Ümid edirik ki, “Gent” neft şeyxlərinin və ya rus investorlarının əlinə keçməz. Bilirik ki, prezident klubun zirvədə rəqabətə davam etməsini istəyən birini axtarır. Ancaq alıcının hansısa neft şeyxi və ya rus investoru olması, əlbəttə ki, bizi qane etməyəcək. Həm də biz yeni rəhbərliyin gəlişindən sonra hər şeyin pis bitdiyi klubların da kifayət qədər nümunəsini görmüşük. Bu, bir çox pərəstişkarı qorxudur, çünki biz bu cür hekayəni qəbul etmək istəmirik”.
