Dubayda Kadi ilə görüşdüm, mənə dedi ki...

“Dubayda təsadüfən Kadi ilə görüşdüm, mənə dedi ki, “Qarabağ” heç vaxt unuda bilməyəcəyim evimdi”. Corner.az xəbər verir ki, bunu “köhlən atlar”ın prezidenti Tahir Gözəl deyib.

Konfrans Liqasının pley-off mərhələsində “Gent”lə (Belçika) oyundan (1:0) sonra jurnalistlərə danışan Gözəl bildirib ki, “Qarabağ”ın vidalaşdığı futbolçular özləri getmək istəyiblər: “Təşəbbüs futbolçulardan gəlib. İstər Vadji olsun, istər Kadi, istər Ovusu. Qanun futbolçunu komandada zorla saxlamağa imkan vermir. Məsələn, Kadiya deyilmişdi ki, minimum 5  milyon avro qarşılığında “Qarabağ”dan gedə bilərsən. Əlimizdən gəldiyi qədər futbolçularla müqavilələrdə klubun xeyrinə olan şərtlər daxil edirik. Amma bir klub bizə 5 milyon avro, futbolçuya da dördqat artıq maaş verirsə, onu heyətdə saxlaya bilmərik”.