“Avrokuboklarda debüt edəcəyimizi nəzərə alsaq, istənilən klubla oyun bizim üçün ciddi sınaqdı”. 90deqiqe.az xəbər verir ki, bunu “Sabah”ın baş məşqçisi Murad Musayev klubun mətbuat xidmətinə açıqlamasında deyib.
Rusiyalı mütəxəssis Konfrans Liqasının II təsnifat mərhələsinin püşkünü dəyərləndirib.
Musayev potensial rəqiblərin güclü olduğunu bildirib: “RFS Latviya çempionatının liderlərindən biridi və ötən mövsümdə Konfrans Liqasının qrup mərhələsində iştirak edib. Bu komandanın əsas üstünlüyü hazırda çıxış etdiyi ölkədə çempionatın davam etməsidi ki, bu da onların avrokubok oyunlarına əla formada gəlmələrinə şərait yaradacaq. “Makedoniya GP” ardıcıl ikinci ildi ölkə kubokunu qazanır. Bu amil onların pley-off matçlarında oynamaq bacarığından xəbər verir”.
Musayev əlavə edib ki, komanda növbəti mövsümün hazırlıqlarına bu gün başlayacaq: “Biz komanda olaraq güclüyük, heç kimdən qorxmuruq. Bütün gücümüzü ortaya qoyaraq, cəsarətli futbol sərgiləməyə çalışacağıq”.
Qeyd edək ki, “Sabah” Konfrans Liqasında ilk oyununu iyulun 27-də səfərdə, cavab görüşünü isə avqustun 3-də evdə keçirəcək.
