“Sabah” Bolqarıstanda son dəqiqə qolu ilə uduzdu

UEFA Konfrans Liqasının III təsnifat mərhələsinin ilk oyunu çərçivəsində səfərdə Bolqarıstanın “Levski” klubu ilə qarşılaşan “Sabah” minimal hesabla məğlub olub.

90deqiqe.Az-ın məlumatına görə, Georgi Asparuxov adına stadionda keçirilən qarşılaşmada yeganə qol matçın əlavə olunmuş vaxtında vurulub. 90+8-ci dəqiqədə Borislav Rupanov fərqlənərək, meydan sahiblərinə qələbə qazandırıb – 1:0.

Cavab oyunu avqustun 14-də Bakıda, “Əlincə Arena”da keçiriləcək. “Sabah” mərhələ adlamaq üçün doğma meydanda cavab verəcək.

Qeyd edək ki, bu cütün qalibi pley-off mərhələsində Niderland təmsilçisi AZ Alkmaar və Lixtenşteynin “Vaduts” klubları arasında keçirilən oyunun qalibi ilə qarşılaşacaq.