"Neftçi" həqiqətən güclü komandadır"

Belarusun "Dinamo" (Minsk) komandasının baş məşqçisi Aleksandr Şaqoyko UEFA Konfrans Liqasının II təsnifat mərhələsində "Neftçi"yə qarşı keçirəcəkləri ilk oyun öncəsi fikirlərini bölüşüb.

90deqiqe.Az xəbər verir ki, mütəxəssis mətbuat konfransında Bakı təmsilçisinin güclü rəqib olduğunu bildirib.

"Güclü rəqibə qarşı oynayacağımızı başa düşürük. "Neftçi" həqiqətən yaxşı komandadır. Bu oyunun əhəmiyyətini dərk edirik", – deyə Şaqoyko vurğulayıb.

Baş məşqçi komandasının qarşılaşmaya ciddi hazırlaşdığını və əsas məqsədin növbəti mərhələyə yüksəlmək olduğunu qeyd edib.

"Qalib iki oyunun nəticəsinə əsasən müəyyənləşəcək. Məqsədimiz növbəti mərhələyə vəsiqə qazanmaqdır. Bu cür matçlarda tez-tez iştirak etmirik. "Neftçi" yüksək səviyyəli komandadır və yaxşı klublarda çalışmış təcrübəli baş məşqçiyə malikdir", – deyə o əlavə edib.

Aleksandr Şaqoyko iki komandanın şanslarını da dəyərləndirib.

"Oyundan əvvəl şanslar həmişə bərabər olur. Bu dəfə də fərqli deyil. Bizim də öz məqsədimiz var və ona çatmaq üçün əlimizdən gələni edəcəyik", – deyə belaruslu mütəxəssis bildirib.

Qeyd edək ki, UEFA Konfrans Liqasının II təsnifat mərhələsinin "Neftçi" – "Dinamo" (Minsk) oyunu iyulun 22-də "Palms Sports Arena"da keçiriləcək. Qarşılaşma saat 20:00-da start götürəcək.