"Neftçi" iki top üstünlüyünü əldən verdi

"Neftçi" UEFA Konfrans Liqasının II təsnifat mərhələsində ilk oyununa məğlubiyyətlə başlayıb.

90deqiqe.Az xəbər verir ki, "ağ-qaralar" Bakıda Belarusun "Dinamo" (Minsk) komandasını qəbul edib.

"Palms Sports Arena"da keçirilən qarşılaşma qonaqların 4:2 hesablı qələbəsi ilə başa çatıb.

Oyuna əla başlayan Bakı təmsilçisi artıq 2-ci dəqiqədə kapitan Emin Mahmudovun qolu ilə hesabı açıb. "Neftçi" 8-ci dəqiqədə rəqib futbolçu Aleksandr Selyavanın avtoqolu sayəsində üstünlüyünü iki topa çatdırıb.

Lakin ilk hissənin sonlarına yaxın Karen Vardanyan fərqi minimuma endirib. Fasilədən dərhal sonra Yevgeni Malaşeviç hesabı bərabərləşdirib. 57-ci dəqiqədə Karen Vardanyan ikinci qolunu vuraraq "Dinamo"nu hesabda önə keçirib. Qarşılaşmada son nöqtəni isə 77-ci dəqiqədə Gulzigit Alykulov qoyub.

Beləliklə, "Neftçi" cavab oyunu öncəsi sərfəli üstünlüyü əldən verərək doğma meydanda 2:4 hesabı ilə məğlub olub.

Qeyd edək ki, komandalar arasında cavab görüşü iyulun 30-da Belarusda keçiriləcək. Bu cütün qalibi UEFA Konfrans Liqasının III təsnifat mərhələsində Serbiyanın "Jelezniçar" və Portuqaliyanın "Braqa" komandaları arasındakı cütün qalibi ilə qarşılaşacaq.