Konfrans Liqasında III təsnifat mərhələsinin daha dörd iştirakçısı müəyyənləşdi

UEFA Konfrans Liqasının II təsnifat mərhələsinin cavab oyunları çərçivəsində daha dörd komanda növbəti raunda vəsiqə qazanıb.

90deqiqe.Az-ın məlumatına görə, Latviyanın "Riqa" klubu Şimali Makedoniya təmsilçisi "Vardar"a əsas vaxtda 1:2 hesabı ilə məğlub olub. Rəqib komanda görüşün böyük hissəsini azlıqda keçirsə də, "Riqa" say üstünlüyündən yalnız əlavə vaxtda yararlana bilib. Nəticədə Latviya təmsilçisi əlavə vaxtda ardıcıl qollar vuraraq 5:2 hesablı qələbə qazanıb və mərhələ adlayıb.

III təsnifat mərhələsinə yüksələn digər komanda Kiprin "Apollon" klubu olub. Kiprlilər iki oyunun yekununda Gürcüstanın "Dila" komandasını 7:0 hesabı ilə üstələyiblər.

Kosovonun "Drita" klubu da mübarizəni davam etdirəcək. Komanda öz meydanında Maltanın "Floriana" kollektivini əlavə vaxtda 2:1 hesabı ilə məğlub edərək növbəti mərhələyə vəsiqə qazanıb.

III təsnifat mərhələsinin digər iştirakçısı isə Bolqarıstanın ÇSKA-1948 (Sofiya) komandası olub. Sofiya təmsilçisi Slovakiyanın "Spartak" (Trnava) klubunu mübarizədən kənarlaşdıraraq növbəti mərhələyə yüksəlib.