"Auda" Konfrans Liqasının pley-off mərhələsinə vəsiqə qazandı

Konfrans Liqasının üçüncü təsnifat mərhələsinin cavab qarşılaşmasında Latviyanın "Auda" klubu doğma meydanda Tirana "Dinamo"sunu qəbul edib.

90deqiqe.Az-ın məlumatına görə, görüşün ilk yarısında komandalar hücumda fəallıq göstərsələr də, hesabı açmaq mümkün olmayıb. Tərəflərin bir neçə qol epizodu olsa da, azarkeşlər fasiləyə qədər qol izləməyiblər.

İkinci hissədə də oyun yüksək tempdə keçməyib. Buna baxmayaraq, 68-ci dəqiqədə meydan sahibləri hesabı açıblar. "Auda"nın heyətində Bartelmi Diediu fərqlənib. Qolun ötürməsini isə Eduard Daşkeviç edib.

Bundan qısa müddət sonra Tirana təmsilçisi azlıqda qalıb. Fabian Perndretsa birbaşa qırmızı vərəqə ilə meydandan kənarlaşdırılıb.

Rəqibin 10 nəfərlə qalmasından sonra "Auda" üstünlüyünü qorumaqda çətinlik çəkməyib. "Dinamo" oyunun sonuna qədər hesabı bərabərləşdirə bilməyib.

Beləliklə, Latviya klubu minimal hesablı qələbə ilə növbəti mərhələyə yüksəlib.