"Qarabağ" "Dinamo"ya minimal hesabla uduzdu

UEFA Konfrans Liqasının III təsnifat mərhələsinin ilk oyununda "Qarabağ" səfərdə Ukraynanın "Dinamo" (Kiyev) komandasına məğlub olub.

90deqiqe.Az-ın məlumatına görə, "Lublin Arena" stadionunda keçirilən qarşılaşma Kiyev təmsilçisinin minimal hesablı qələbəsi ilə başa çatıb - 1:0.

Görüşdə yeganə qolu 10-cu dəqiqədə Matvey Ponomarenko vurub.

Ağdam təmsilçisi matçı azlıqda başa vurub. Belə ki, Cebrail Makreçkis 90-cı dəqiqədə qırmızı vərəqə alaraq meydandan kənarlaşdırılıb.

Qeyd edək ki, komandalar arasında cavab görüşü avqustun 13-də Bakıdakı Tofiq Bəhramov adına Respublika stadionunda keçiriləcək. Oyun saat 20:00-da start götürəcək.