Lorisdən Fransa millisi üçün yeni rekord

Fransa millisinin və “Tottenhem”in qapıçısı Uqo Loris yığma komandanın yeni rekordunu müəyyənləşdirib.

Corner.az xarici KİV-lərə istinadən xəbər verir ki, 33 yaşlı qapıçı buna ötən gün Millətlər Liqasının 4-cü turunda Xorvatiya ilə matçda (1:2) nail olub. Fransa millisinin heyətində 72-ci rəsmi oyununa çıxan qolkiper belə nəticə ilə millidə ən çox rəsmi oyun keçirən futbolçu olub.

Bundan əvvəl ən yüksək göstərici Lilian Tyorama məxsus idi. O, yığma komanda ilə 71 rəsmi matçda iştirak etmişdi. 3-cü yerdə isə Tyerri Anridir- 66 qarşılaşma.

Qeyd edək ki, Fransa millisi A Liqasının 3-cü qrupunda 10 xalla 2-cidir. Cədvələ aktivində eyni xalı olan Portuqaliya millisi başçılıq edir. Xorvatiya 3 xalla 3-cü, İsveç isə 0 xalla sonuncudur.