Millimiz Monteneqro ilə heç-heçə etdi

Azərbaycan yığması Millətlər Liqasında növbəti oyununa çıxıb.

Corner.az xəbər verir ki, C liqasının 1-ci qrupunda çıxış edən millimiz Monteneqro ilə üz-üzə gəlib.

Qrup mərhələsinin 5-ci turu çərçivəsində baş tutan qarşılaşma Canni de Byazinin yetirmələrinin sonuncu ev matçı olub. Lakin millimiz məlum səbəblərdən rəqibini ölkə xaricində – Xorvatiyanın Zapreşiç şəhərindəki “İvan Laylak-İviç” stadionuna qəbul edib. 90 dəqiqə ərzində tərəflər qapılara yol tapa bilməyiblər. 

Qeyd edək ki, qrupun digər matçında Lüksemburqla Kipr üz-üzə gəlib. Üç qolun qeydə alındığı bu qarşılaşma isə meydan sahiblərinin əzmkar qələbəsiylə yekunlaşıb.

UEFA Millətlər Liqası
C liqası, 1-ci qrup
14 noyabr

Azərbaycan – Monteneqro 0:0
Qırmızı vərəqə: İ.İvanoviç, 45+1 (ikinci sarı).
Baş hakim: Sergey İvanov (Rusiya).
Zapreşiç (Xorvatiya). İvan Laylak-İviç stadionu.