Xorvatiyadan Fransa ilə heç-heçə, Qazaxıstandan növbəti qələbə

Bu gün UEFA Millətlər Liqasının qrup mərhələsində 2-ci turun növbəti oyunları keçirilib. Corner.az xəbər verir ki, A,B,C və D Liqaları çərçivəsində ümumilikdə 7 qarşılaşma baş tutub.

A Liqasının 1-ci qrupunda son dünya çempionu Fransa səfərdə Xorvatiyanın qonağı olub. Bu komandalar ilk turda məğlubiyyətlə üzləşmişdilər. Bu görüşdə isə tərəflər meydandan hərəyə 1 qol və 1 xalla ayrılıblar.  Avstriya və Danimarkanın dueli isə nəzərdə tutulan vaxtda başlamayıb. Stadionda elektrik enerjisinin kəsilməsi səbəbindən görüş 1.5 saat yubanıb. Matçda isə Danimarka qələbəyə sevinən tərəf olub.

B Liqasının yeganə matçında İslandiya evdə Albaniyanı sınağa çəkib. Bu oyunda qalib müəyyənləşməyib. Rusiyanın yarışdan uzaqlaşdırılması səbəbindən İsrail bu tur istirahət edib.

C Liqasının 3-cü qrupunda Azərbaycan seçməsi Serbiyada Belarusla qarşılaşıb. Bu oyunda qapılara qol vurulmayıb. Qazaxıstan isə bu dəfə Slovakiyanın qonağı olub və ardıcıl ikinci qələbə qazanaraq vahid liderliyi ələ keçirib.

D Liqasının 1-ci qrupunda Latviya Lixtenşteyni məğlub yola salıbsa, Andorra – Moldova matçında qapılara qol vurulmayıb.

UEFA Millətlər Liqası
6 iyun

A Liqası, 1-ci qrup

Avstriya – Danimarka 1:2
Qol: Şlager, 67 – Hoybyerq, 28. Larsen, 84.

Xorvatiya – Fransa 1:1
Qol: Kramariç, 83-pen – Rabyo, 52.

Xal durumu: Danimarka – 6, Avstriya – 3, Fransa – 1, Xorvatiya – 1

B Liqası, 2-ci qrup

İslandiya – Albaniya 1:1
Qol: Torsteynsson, 49 – Seferi, 30.

Xal durumu: İslandiya – 2, İsrail – 1, Albaniya – 1, Rusiya – 0

C Liqası, 3-cü qrup

Belarus – Azərbaycan 0:0

Slovakiya – Qazaxıstan 0:1
Qol: Darabayev, 26.

Xal durumu: Qazaxıstan – 6, Slovakiya – 3, Belarus – 1, Azərbaycan – 1

D Liqası, 1-ci qrup

Latviya – Lixtenşteyn 1:0
Qol: Zyuzin, 73.

Andorra – Moldova 0:0

Xal durumu: Latviya – 6, Moldova – 4, Andorra – 1, Lixtenşteyn – 0