Millimiz Slovakiyaya məğlub oldu

Futbol üzrə Azərbaycan yığması bu gün UEFA Millətlər Liqasında növbəti oyununa çıxıb. Corner.az xəbər verir ki, Canni De Byazinin rəhbərlik etdiyi komanda C Liqasının 3-cü qrupunda Slovakiya yığmasını qəbul edib.

“Dalğa Arena”da baş tutan qarşılaşmanı Litvadan olan hakimlər briqadası idarə edib.

Azərbaycan seçməsi ilk görüşündə səfərdə Qazaxıstana 0:2 hesabı ilə məğlub olmuş, daha sonra isə Serbiyada Belarusla heç-heçə etmişdi – 0:0. İlk turda Serbiyada Belarus üzərində 1:0 hesabı ilə qələbə qazanan slovaklar isə ikinci qarşılaşmasında Qazaxıstana eyni hesabla uduzmuşdu. Bu yenilgidən sonra baş məşqçi Ştefan Tarkoviç istefaya göndərilmişdi.

Azərbaycan millisi indiyədək Slovakiya ilə 6 dəfə üz-üzə gəlmişdi. Bu matçların 5-də məğlub olan yığma yalnız 2001-ci ildə Bakıda DÇ-2002-nin seçmə mərhələ oyununda qələbə qazana bilmişdi. Budəfəki qarşılaşmada da qələbəyə sevinən tərəf slovaklar olub.

Qrupun digər görüşündə Belarus yığması Serbiyada Qazaxıstanla qarşılaşacaq.

UEFA Millətlər Liqası
C Liqası, 3-cü qrup
10 iyun

Azərbaycan – Slovakiya 0:1
Qol: V.Vayss, 81.
Baş hakim: Donatas Rumsas (Litva).
Bakı. “Dalğa Arena”.