“İspaniyanı məğlub etmək çox çətindir, amma biz iddialıyıq”

İngiltərə millisinin baş məşqçisi Tomas Tuxel İspaniya ilə qarşılaşma öncəsi rəqibin oyun üslubunu və müdafiəsini dəyərləndirib.

90deqiqe.Az-ın məlumatına görə, almaniyalı mütəxəssis UEFA Millətlər Liqasının A Liqası 3-cü qrupunda sabah keçiriləcək İngiltərə - İspaniya oyunu öncəsi mətbuat konfransında bildirib ki, topa sahib olmaq İspaniyanın oyun fəlsəfəsinin əsas hissəsidir.

“Onların oyun tərzi belədir və buna güvənirlər. Belə məşq edirlər, belə yetişdirilirlər və futbolu belə oynayırlar. Bu, onların bir hissəsidir. Amma hazırda İspaniyanı, son oyunlarını və keçirdikləri son turnirləri nə qədər çox analiz etsəniz də, onların müdafiə tərzinə heyran qalmamaq mümkün deyil. Onlar bunu oyunlarına əlavə ediblər. Topa qarşı müdafiə kollektiv şəkildə qurulur və rəqibi təzyiqə başlaya biləcəkləri geniş sahələrə yönləndirməkdə çox mahirdirlər”, - deyə Tuxel bildirib.

İspaniyanın dünya səviyyəsində üç qapıçısının olduğunu vurğulayan baş məşqçi rəqibə qarşı qol imkanları yaratmağın çətin olduğunu qeyd edib:

“Onlar demək olar ki, heç vaxt ciddi sınaqdan keçirilmir. Dünyadakı hər bir komanda üçün onlara qarşı qol vəziyyətləri yaratmaq çox çətindir. Bizim planımız və ambisiyamız var. Bunun əksini sübut etmək və istisna olmaq istəyirik. Amma hazırda onlar çox komplekt komandadırlar”.

Tuxel Trent Aleksander-Arnoldun İspaniya ilə oyunda meydana çıxıb-çıxmayacağı barədə suala da cavab verib.

“Əlbəttə, bunu sizə deməyəcəyəm. O, mövqe üçün Carel Kuanza ilə rəqabət aparır. Carel ABŞ-da bizim üçün oynayıb, Fransa və Meksikaya qarşı meydana çıxıb. Hazırda rəqabət belədir və Trent buna hazırdır. Ümumilikdə çox yaxşı məşq keçirdik və o da bunun dəyərli və vacib hissəsi idi”, - deyə mütəxəssis bildirib.

Tuxel həmçinin milli komandaların oyunları üçün təqvimdə tətbiq edilən yeni sistemi dəstəkləmədiyini söyləyib.

“Uzun turnirdən sonra belə uzun fasilənin olması futbolçular üçün emosional və fiziki baxımdan çox çətindir. Düşünürəm ki, futbolçular qısa bir pəncərəyə və ya üç qısa pəncərəyə üstünlük verərdilər”, - deyə o qeyd edib.

İngiltərə millisinin baş məşqçisi İspaniya ilə oyundan çox şey öyrənə biləcəklərini də vurğulayıb:

“Onları məğlub etmək çox çətindir, amma biz iddialıyıq və acıq. Fransa üzərində təsirli qələbədən gəlirik. Belə qısa müddətdə Argentina, Fransa və İspaniya ilə oynamaq çox unikaldır. Futbolçular diqqətli və qətiyyətlidirlər. Hazırda olduğumuz yer budur”.