Ukrayna Macarıstanı məğlub etdi

Millətlər Liqasında Ukrayna və Macarıstan yığmaları üz-üzə gəlib.

90deqiqe.Az-ın məlumatına görə, qarşılaşma Ukrayna millisinin 1:0 hesablı qələbəsi ilə başa çatıb.

Matçın ilk dəqiqələrində komandalar ehtiyatlı oyun nümayiş etdirib və hücumda böyük risklərə getməyiblər.

Hesab 42-ci dəqiqədə açılıb. Daniil Sikan yaranmış imkandan yararlanaraq topu Macarıstanın qapısından keçirib.

İkinci hissədə Macarıstan təzyiqi artırmağa və rəqibin müdafiəsini daha çox yükləməyə çalışıb. Ukrayna isə əldə etdiyi üstünlüyü qorumağa üstünlük verib.

Macarıstanın hesabı dəyişmək cəhdlərinə baxmayaraq, qarşılaşmada ikinci qol vurulmayıb.

90+2-ci dəqiqədə Ukrayna millisinin futbolçusu Aleksandr Nazarenko qırmızı vərəqə alıb. Lakin Macarıstan qalan vaxtda say üstünlüyündən yararlana bilməyib.