İspaniya İngiltərəni məğlub etdi

Millətlər Liqasının A Liqasında qrup mərhələsinin ilk turunda İngiltərə və İspaniya yığmaları qarşılaşıb.

90deqiqe.Az-ın məlumatına görə, Londondakı “Uembli” stadionunda keçirilən görüş İspaniyanın 3:2 hesablı qələbəsi ilə başa çatıb. Matçı italiyalı baş hakim Davide Massa idarə edib.

Qarşılaşmada hesab artıq 2-ci dəqiqədə açılıb. İspaniya millisinin vingeri Lamin Yamal fərqlənərək komandasını önə keçirib.

İngiltərə 36-cı dəqiqədə Entoni Qordonun qolu ilə hesabı bərabərləşdirib. Cəmi dörd dəqiqə sonra isə Harri Keyn meydan sahiblərini önə keçirib – 2:1.

Keyn 54-cü dəqiqədə penaltidən yararlana bilməyib. Cud Bellinqemə qarşı qayda pozuntusuna görə təyin olunan 11 metrlik cərimə zərbəsində ingilis hücumçunun zərbəsi dirəyə dəyib.

İspaniya 60-cı dəqiqədə Aleks Baenanın qolu ilə hesabı yenidən bərabərləşdirib – 2:2.

Matçın 74-cü dəqiqəsində Mikel Oyarsabal İspaniyanı bir daha önə keçirib və görüşün yekun hesabını müəyyənləşdirib – 3:2.

Beləliklə, İspaniya ilk turda səfərdə İngiltərəni məğlub edib.

Qeyd edək ki, qrup mərhələsinin 2-ci turunda İngiltərə sentyabrın 29-da Çexiya, İspaniya isə həmin gün Xorvatiya ilə qarşılaşacaq.

Millətlər Liqasının son qalibi Portuqaliya millisidir. Portuqaliya finalda İspaniyanı əsas və əlavə vaxtda 2:2 hesabı ilə başa çatan matçın penaltilər seriyasında 5:3 hesabı ilə məğlub edib. Portuqaliya yığması turnirin tarixində iki dəfə çempion olub.