“Praqada bizi çətin oyun gözləyir”

İngiltərə millisinin baş məşqçisi Tomas Tuxel UEFA Millətlər Liqasında Çexiyaya qarşı keçiriləcək oyun öncəsi mətbuat konfransında fikirlərini bölüşüb.

90deqiqe.Az-ın məlumatına görə, almaniyalı mütəxəssis rəqibə hörmətlə yanaşdıqlarını və qarşılaşmanın çətin keçəcəyini bildirib.

“Rəqibə, onun səviyyəsinə hörmət edirik və Praqada bizi nə qədər çətin oyunun gözlədiyini anlayırıq”, - deyə Tuxel vurğulayıb.

Baş məşqçi İspaniya ilə əvvəlki görüşdə start heyətində meydana çıxan Ezri Konsa və Niko O'Raylinin səhhətində kiçik problemlərin olduğunu və onların Çexiyaya qarşı matçı buraxa biləcəyini açıqlayıb.

“İdeal halda eyni heyətlə meydana çıxmaq istərdim. Lakin həkimlər, fizioterapevtlər və futbolçuların özləri ilə danışmalıyam. Toplanışdan əvvəl çox rotasiya etmək niyyətində deyildim. Bununla belə, futbolçuların vəziyyətinə hər zaman diqqətlə yanaşacağıq”, - deyə Tuxel qeyd edib.

Qeyd edək ki, Çexiya - İngiltərə qarşılaşması sentyabrın 29-da keçiriləcək. İngiltərə yığması əvvəlki turda doğma meydanda İspaniyaya 2:3 hesabı ilə məğlub olub.