Türkiyə millisində Vinçentso Montella ilə bağlı qərar verilib

Türkiyə Futbol Federasiyasının (TFF) rəhbərliyi milli komandanın baş məşqçisi Vinçentso Montella ilə yolları ayırmaq qərarına gəlib.

90deqiqe.Az-ın məlumatına görə, qərara səbəb yığmanın dünya çempionatındakı uğursuz çıxışı və UEFA Millətlər Liqasında ardıcıl dörd məğlubiyyət alması olub.

İddialara görə, TFF italiyalı mütəxəssislə müqaviləyə xitam verəcəyi halda ona beş aylıq maaşı həcmində təzminat ödəməyi planlaşdırır.

Qeyd edək ki, Türkiyə millisi son qarşılaşmada İtaliyaya 1:3 hesabı ilə uduzub. Bununla da “ay-ulduzlular” turnirdə xalsız qalıblar.

Türkiyə millisi Vinçentso Montellanın rəhbərliyi altında keçirdiyi 40 oyunda 21 qələbə qazanıb, 5 dəfə heç-heçə edib və 14 qarşılaşmada məğlub olub.