Montella Türkiyə millisinin azarkeşlərinə təşəkkür edib

İtaliyalı mütəxəssis Vinçenzo Montella Türkiyə millisinin baş məşqçisi vəzifəsindən ayrıldıqdan sonra azarkeşlərə təşəkkürünü bildirib.

90deqiqe.Az-ın məlumatına görə, mütəxəssis bu barədə sosial şəbəkə hesabında paylaşım edib. O, futbolçuların fədakarlığını və komandaya bağlılığını xüsusi vurğulayaraq, ayrılıqdan sonra onlardan çoxsaylı səmimi mesajlar aldığını qeyd edib.

“İstənilən hekayənin sonu var, lakin birlikdə keçilən bəzi yollar futboldan çox-çox uzaqlarda iz buraxır”, – deyə Montella yazıb.

İtaliyalı məşqçi Türkiyə millisinin azarkeşlərinə də təşəkkür edib. O, komanda ilə birlikdə unudulmaz anlar yaşadıqlarını, tarixi nailiyyətlər əldə etdiklərini və çətinliklərin öhdəsindən gəldiklərini bildirib.

Montella Türkiyə millisinin heyətində qazandığı təcrübəni və türk xalqının sevgisini daim qəlbində saxlayacağını vurğulayıb.

Qeyd edək ki, Vinçenzo Montella 2023-cü ildən Türkiyə millisinə rəhbərlik edib. Onun rəhbərliyi altında komanda AVRO-2024 və 2026-cı il dünya çempionatının seçmə mərhələlərində mübarizə aparıb.