Kriştiano Ronaldo 30 günlük cəzaya məruz qalıb və 255 avro cərimələnib

"Əl Nəsr" klubunun hücumçusu və “Qızıl top”un beşqat sahibi Kriştiano Ronaldo Portuqaliya millisinin düşərgəsini icazəsiz tərk etdiyinə görə 30 gün müddətinə cəzalandırılıb və 255 avro məbləğində cərimələnib.

90deqiqe.Az-ın məlumatına görə, bu barədə jurnalist Fabritsio Romanonun “X” sosial şəbəkəsində Portuqaliya Futbol Federasiyasının bəyanatına istinadən yaydığı məlumata görə, qərar intizam qaydalarının pozulması ilə əlaqədar qəbul edilib.

Beləliklə, cəza müddəti noyabr oyunlarına qədər başa çatacağından Ronaldo Millətlər Liqasında Danimarka və Uels yığmalarına qarşı keçiriləcək görüşlərdə iştirak edə biləcək.

Portuqaliya millisinin kapitanı sentyabrın 30-da məşq toplanışı zamanı komandanın düşərgəsini tərk edib. Futbolçu buna baş məşqçi Jorje Jezuşun ona verdiyi vədləri iki dəfə pozmasını səbəb göstərib.

Ronaldu Millətlər Liqasının yeni mövsümündə Uelslə keçirilən və Portuqaliyanın 1:0 hesablı qələbəsi ilə başa çatan oyunda iştirak edib. Norveçlə qarşılaşmada isə (2:1) ehtiyat oyunçular skamyasında qalıb. Əvvəlcə meydana çıxması planlaşdırılmasa da, baş məşqçi ondan oyunun gedişində meydana çıxmağa hazır olmasını istəyib. Lakin futbolçu matçın sonunadək ehtiyatda qalıb.

Daha sonra Ronaldo milli karyerasını başa vurmaq niyyətində olmadığını və yığmaya dəvət olunacağı təqdirdə oynamağa hazır olduğunu bildirib.

Portuqaliya millisi Millətlər Liqasında keçirdiyi dörd oyunun hamısında qalib gələrək 1/4 finala vəsiqəni təmin edib. Komanda qrup mərhələsinin son oyunlarında noyabrın 14-də Danimarka, noyabrın 17-də isə Uelslə qarşılaşacaq.

Qeyd edək ki, 41 yaşlı Ronaldo Avropa çempionu, ikiqat Millətlər Liqası qalibi və beşqat Çempionlar Liqası çempionudur. O, milli komandalar, Avropa çempionatları, Çempionlar Liqası və klublararası dünya çempionatları tarixində qol rekordlarına imza atıb.

2022-ci ilin dekabrından Səudiyyə Ərəbistanının “Əl-Nəsr” klubunda çıxış edən futbolçu karyerası ərzində Portuqaliyanın “Sportinq”, İngiltərənin “Mançester Yunayted”, İspaniyanın “Real Madrid” və İtaliyanın “Yuventus” komandalarının formasını da geyinib.

Ronaldo karyerası ərzində ümumilikdə 981 qol vurub. Onlardan 146-sı Portuqaliya millisinin, 835-i isə klub komandalarının heyətində qeydə alınıb.