Yığmanın heyətinin yarısı dəyişdirilməlidir - Zaur Axundov

"Milli komanda üçün ölkə xaricində bir neçə mütəxəssislə danışıq aparılır".

Corner.az-ın məlumatına görə, bunu "Keşlə" klubunun prezidenti və AFFA İcraiyyə Komitəsinin üzvü Zaur Axundan milli assosiasiyanın növbədənkənar Konfransından sonra jurnalistlərə açıqlamasında deyib. O, yığmadakı baş məşqçi məsələni zamanın öhdəsinə buraxmalı olduqlarını bildirib. Axundov deyib ki, milliyə yerli, yoxsa əcnəbi mütəxəssisin rəhbərlik etməsinə qərar verə bilməz: "AFFA İcraiyyə Komitəsinin iclası olacaq. Qurumun rəhbərliyi var. Şəxsi fikrim budur ki, milliyə təcrübəli baş məşqçi lazımdır. Yığmanın heyətinin yarısının dəyişdirilməsinin, gənc nəslə üstünlük verilməsinin tərəfdarıyam. Klublarımızda yaxşı futbolçular mövcuddur. Futbolla alışıb-yanan, öz üzərində çalışan, futbolu sevən, dedi-qodulara, təzyiqlərə fikir verməyənlər yığmada olmalıdır. Hamı milli komanda üçün çalışmalıdır, çünki ölkəmizin adını təmsil edir. Şəxsən mənim üçün birinci milli, sonra "Keşlə" gəlir".

Axundov "Keşlə"nin baş məşqçisi Tərlan Əhmədovun adının milli komanda ilə hallanmasına da münasibət bildirib. O, klub rəhbəri kimi buna sevindiyini söyləyib: "Hər bir rəhbər üçün təkcə baş məşqçisi yox, futbolçusunun milliyə dəvət edilməsi sevindiricidir. Mətbuatımızın belə məsələləri işıqlandırması tərifəlayiqdir. Bu, o deməkdir ki, media da yerli mütəxəssislərin çalışmasını istəyir. Təkcə Tərlan Əhmədovun yox, Ayxan Abbasovun, Samir Abasovun da adı var idi. Onlar bizim gənc mütəxəssislərimizdir. Hər şeyi zaman göstərəcək. Tərlan müəllimlə bu barədə söhbətim olmayıb. O, hazırda "Keşlə"nin təlim-məşq toplanışı ilə məşğuldur".