Türkiyənin Antalya şəhərində təlim-məşq toplanışında olan “Zirə” bu gün Bakı vaxtı ilə saat 17:00-da ilk yoxlama oyununu keçirəcək.
Corner.az-ın Goal.az-a istinadən məlumatına görə, bakılılar Qazaxıstanın “Taraz” klubu ilə görüşəcək.
Bu, "Zirə"nin Qazaxıstan təmsilçiləri ilə 2-ci dueli olacaq. Təmsilçimiz indiyədək yalnız 1 dəfə bu ölkədən olan komanda ilə üz-üzə gəlib. Bu, 3 il əvvəl baş verib. 2016-cı il yanvarın 16-da Antalyada hazırlıq keçən “Zirə” “Ordabası” ilə qarşılaşıb. Həmin görüşdə Premyer Liqa təmsilçisi 1:4 hesabı ilə uduzub. “Zirə”nin yeganə qoluna Nurlan Novruzov imza atıb. O, görüşün 55-ci dəqiqəsində, hesab 0:2 olarkən Qazaxıstan klubunun qapısına yol tapıb.
Bugünkü matç “Zirə”nin ümumilikdə Antalyada 20-ci yoxlama oyunu olacaq. İndiyədək “Zirə” qonşu ölkədə 19 dəfə qüvvəsini sınayıb. Bu görüşlərdən birində rəqib Azərbaycan təmsilçisi “İnter” (indiki “Keşlə”) olubsa, digər 18 yoxlama oyunu beynəlxalq xarakter daşıyıb.
Bakılılarla dueldə 2:0 hesabı ilə qalib gələn “Zirə” xarici klublarla duellərdə 7 qələbə qazanıb, eyni sayda da məğlubiyyət alıb və 4 heç-heçə edib. Beynəlxalq yoxlama qarşılaşmalarında 23 qol vuran "Zirə" 18 top buraxıb.
