Canni de Byazi üçün əlamətdar oyun

Azərbaycan yığması sabah növbəti yoldaşlıq görüşündə qüvvəsini sınayacaq. Corner.az xəbər verir ki, komandamız səfərdə Şimali Makedoniya ilə üz-üzə gələcək. Skopyedə baş tutacaq qarşılaşma  yığmamızın baş məşqçisi Canni de Byazi üçün əlamətdar olacaq. Bu, 66 yaşlı mütəxəssisin millimizdə yubiley – 30-cu oyunu kimi tarixə düşəcək.

İtaliyalı çalışdırıcı, indiyədək yığmanı 29 matça çıxarıb. Bu görüşlərdə 6 qələbə və 7 heç-heçəsi olan millimiz 16 dəfə uduzub. 22 qol vuran komanda 37 top buraxıb.

Bu, italiyalı ilə həm də yubiley - 10-cu yoldaşlıq görüşüdür. Əvvəlki 9 oyunda 2 qələbə, 2 heç-heçə və 5 məğlubiyyəti olan yığmamız 8 qol vurub, 11-ni buraxıb.

Skopyedəki duel yoldaşlıq oyunları və qeyri-rəsmi beynəlxalq turnirlər çərçivəsində 134-cü matçdır. Əvvəlki 133 sınaqda 36 qələbə və 44 heç-heçəsi olan milli 53 dəfə məğlubiyyətə üzülüb. 123 qol vuran futbolçularımız 168 top buraxıb. 

Qeyd edək ki, sabah baş tutacaq Şimali Makedoniya - Azərbaycan qarşılaşması Bakı vaxtı ilə saat 17:00-da başlayacaq.