Hüseyin Seyliğli: "Futbolçumuza qırmızı kart verildikdən sonra edə biləcəyimiz bir şey qalmadı"

"Matça yaxşı başladıq. Birinci hissənin sonlarında - 45-ci dəqiqədə qol buraxdıq. Həmin qol əhvalımı korladı. İkinci yarıya bir az həvəslə başladıq. Futbolçumuza qırmızı kart verildi və bundan sonra edə biləcəyimiz bir şey qalmadı. Davam etməyə çalışdıq. Bizim üçün şanssız gün idi".

Corner.az xəbər verir ki, bu fikirləri Azərbaycanın U-21 millisinin futbolçusu Hüseyin Seyliğli Gürcüstana uduzduqları (0:3) AVRO-2021-in seçmə oyunundan sonra jurnalistlərə açıqlamasında deyib.

İyirmi yaşlı müdafiəçi çox yorulduqlarını söyləyib: "Bundan 4 gün öncə Slovakiya ilə oyuna çıxdıq. Bizim üçün çətin oyun idi. Qarşılaşmanın sonlarında qol vurduq və qələbə qazandıq. Bu görüşü isə 10 nəfərlə bitirdik. Bizim üçün çətin oldu".

Seyliğli deyib ki, iki oyunla müqayisədə bəlkə də heyətdə bəzi dəyişikliklər etmək lazım idi: "Baş məşqçinin qərarıdır. Bu barədə bir söz deyə bilmərəm".

Futbolçu Slovakiya qalibiyyətinin (2:1) təsadüf olmadığını sözlərinə əlavə edib: "Bu gün də 45-ci dəqiqəyə qədər yaxşı oyun sərgilədik. Bəlkə birinci qolu buraxmasaydıq, ikinci hissəyə əzmli çıxa bilərdik. Gürcüstan yaxşı kollektivdir. Amma hesab belə olmalı deyildi".

Seyliğli qrupdakı hədəfləri barədə danışmaq istəməyib: "Hazırda bu barədə bir söz deyə bilmərəm. Oynadığım rəqiblər bizim səviyyəmizdədir. Bu gün 0:3 hesabı ilə məğlub olmağımıza baxmayın. Bir az yorğunluq var idi. Qırmızı kart da oldu. Bu məğlubiyyətin bizə çox da təsir etməyəcəyini düşünürəm".