Azərbaycan U-21 millisi seçmə mərhələni qələbə ilə başa vurub

21 yaşadək futbolçulardan ibarət Azərbaycan millisi Avropa çempionatının seçmə mərhələsində son oyununu keçirib.

90deqiqe.Az-ın məlumatına görə, Rəşad Eyubovun rəhbərlik etdiyi yığma Bakıda Cəbəllütariq U-21 komandası ilə qarşılaşıb.

B qrupunun “Bank Respublika Arena”da keçirilən görüşündə Azərbaycan millisi rəqibini 3:0 hesabı ilə məğlub edib.

Yığmamızın heyətində Nihat Əhmədzadə 8-ci dəqiqədə hesabı açıb. Ağadadaş Salyanski isə 43-cü və 51-ci dəqiqələrdə fərqlənərək komandasının qələbəsini rəsmiləşdirib.

Beləliklə, Azərbaycan U-21 millisi seçmə mərhələni 10 xalla başa vurub. Yığmamız 6 komandanın yer aldığı B qrupunda 5-ci pillədə qərarlaşıb.