Millimizə əcnəbi baş məşqçi gətirilir

Qurban Qurbanovun istefaya göndərilməsindən sonra Azərbaycanın əsas milli komandasına əcnəbi çalışdırıcının gətiriləcəyi dəqiqləşib.

AFFA-nın baş katibi Elxan Məmmədov məlumatı təsdiq edərək bununla bağlı deyib:

“Bizim namizəd siyahımız genişdir. Amma hələlik heç kimlə danışmamışıq. Siyahımızda italiyalı namizədlər olsa da, onlar çox deyil. Elə ölkələr var ki, namizədləri daha çoxdur”.

Millinin yeni baş məşqçisinin yaxın bir ay ərzində, ən geci isə 2019-cu ilin yanvarın sonuna qədər açıqlanacağı ehtimalı çoxdur. Ən azı ona görə ki, martda “Avro-2020”nin seçmə mərhələsi başlayır və millinin yeni əcnəbi baş məşqşisi qısa zamanda fəaliyyəti başlamalıdı.

Amma məsələ burasındadır ki, təkcə A milli deyil, aşağı yaş qrupları üzrə komandalardan biri də əcnəbiyə tapşırılacaq. Burada söhbət hazırda baş məşqçi vəzifəsi boş olan U-21 və ya U-17 komandasının birindən gedir. Elxan Məmmədov özü də bununla bağlı xəbəri təsdiq edib.

Hazırda AFFA rəhbərliyi, baş katib Elxan Məmmədovun birbaşa nəzarəti ilə onun özünün söylədiyinə görə, milliyə namizədləri qurumun tərkibində fəaliyət göstərən Məşqçilər Komitəsinin üzvləri ilə müzakirə edir.

Məşqçilər Komitəsinə uzun müddətdir heç bir klubu çalışdırmayan aşağıdakı futbol mütəxəssisləri daxildir:

Vaqif Sadıqov (sədr), Ağasəlim Mircavadov, Şakir Qəribov, Şahin Diniyev (köhnə-yeni üzv) və Yaşar Vahabzadə (yeni üzv).(modern.az)