"İstədiyimiz "Neftçi" bu deyil" - Sabiq futbolçu

“Qarabağ həmişə uğur qazanıb, heç vaxt geriyə addım atmayıb. Əksinə uğur üstünə uğur gətirmək istəyib".

Qarabağ futbol klubunun sabiq yarımmüdafiəçisi Əfran İsmayılov bu sözləri Corner.az-a müsahibəsində söyləyib. O, Azərbaycan klublarının oyunlarını dəyərləndirib:

“Ola bilər ki, Qarabağda hansısa transferlər gözlənilən kimi çıxmayıb. Amma Çempionlar Liqasına qatıla bilsə, bu, böyük uğur olacaq. Ora qatıla bilməsə, Avroliqada 1\16, 1\8-ə qədər irəliləyəcəyinə inanıram”.  

Daha sonra “Sabah”ın adını çəkərək, onun fəaliyyətini yüksək qiymətləndirib:

“Sabaha gəlincə, sevindiricidir ki, ildən-ilə inkişaf edir. Akademiya açır, futbolçuları, məşqçiləri çox yaxşı işlər görür. Böyük işlər gördükləri üçün Avroliqaya vəsiqə qazandılar. Baxmayaraq ki, təcrübəsi yoxdu, birinci ilidi, amma inanıram ki, layiqli oyun göstərib, yuxarıya doğru yüksələcəklər”.

Əfran İsmayılov iki klubun oyunlarından fərqli olaraq, “Neftçi”ni müsbət qiymətləndirə bilməyib:

“Neftçi oyunlarda zəif çıxış edir. Yəni istədiyimiz Neftçi bu deyil. Biz Neftçidən tamamilə fərqli oyunlar gözləyirik. Çünki Neftçi flaqmandı, köklü klubdu. Hamı gözünü açıb Neftçini görüb. Nə olur, olsun, Neftçinin nəticəsi olmalıdı. Üstündəki uğursuzluğu mütləq atmalı və özlərini mütləq sübut etməlidirlər. Neftçinin Qarabağla xal fərqi 25-di, bu, çox üzücüdü".

Bütün məğlubiyyətlərdən sonra qələbənin vacibliyini vurğulayan sabiq futbolçu “Bunları unutdurmaq üçün Neftçi kuboku qazanmalıdı” deyə fikrini yekunlaşdırıb.

Şəfəq Samed