“17 pillə irəliləyiş elə yerində saymaqdır” - EKSKLÜZİV MÜSAHİBƏ

“Samir Abbasov, Tərlan Əhmədov, Nazim Süleymanov kimi mütəxəssislər milliyə gətirilə bilər”

Bu sözləri 90deqiqe.az saytına eksklüziv açıqlama verən tanınmış idman jurnalisti Rasim Mövsümzadə söyləyib. O, geridə qalan 15 ilin millimiz üçün itirilən vaxtdan başqa bir şey olmadığını qeyd edib. Həmin müsahibəni təqdim edirik: 

- Azərbaycan millisinin hazırda vakant olan baş məşqçi vəzifəsi son günlər geniş müzakirə mövzusudur. Yerli, yoxsa əcnəbi mütəxəssis?

- Son 15 ildə Azərbaycan millisinə rəhbərlik edən beş məşqçidən dördü əcnəbi olub. 2008-ci ilin iyununda alman Berti Foqtsun rəhbərliyilə ilk oyununa çıxanda FIFA reytinqində 137-ci mövqedə qərarlaşmış komandamız indi də 120-ci yerdədir – bu uzun müddətdə cəmi 17 pillə irəliləyiş elə yerində saymaq kimi bir şeydir. Elə bu fakt əcnəbilərə milyonların boşuna xərclənməsinin aşkar sübutudur.
Ölkəmizdə çalışdığı dövrdə Avropa milli komandalarının məşqçiləri arasında ən qocalardan olan 67 yaşlı Canni De Byazi də, sələflərindən alman Berti Foqts da 4 turnirdə iş başında olublar, amma bu illər ərzində Azərbaycan millisi yalnız bircə dəfə DÇ-2014-ün seçmə mərhələsində altı iştirakçılı qrupda 4-cü yeri tutub.
Bəs onda seçmə mərhələlərdə qrupda, əsasən, sonuncudan əvvəlki yeri tutmaq üçün bahalı əcnəbi məşqçilərə nə ehtiyac var?
Bir sözlə, itirilmiş 15 il.

- Amma De Byazi milli komandamızın onun rəhbərliyilə inkişaf etdiyini deyirdi. Siz bu barədə nə düşünürsüz?
- Hər seçmə mərhələdə qazanılan bir-iki qələbəyə inkişaf demək olmaz. Ona qalsa, vaxtilə İsveçrə, Slovakiya, Serbiya və Çernoqoriya, Finlandiya kimi rəqiblər üzərində qələbələr, ən böyükhesablı qələbələrimizdən biri - Lixtenşteynlə oyunda 4:0 - Azərbaycan məşqçilərinin rəhbərliyilə qazanılıb.
Elə indi də bizdə komandasını ardıcıl 10 il avrokuboklarda qrup mərhələsinə çıxaran Qurban Qurbanov, ölkə birinciliyində “Qarabağ”ın çempionluq seriyasını “Neftçi” ilə dayandırmağı bacaran Samir Abbasov, zəif komandaları “canlandırmaq” xüsusiyyətinə malik Tərlan Əhmədov, ölkəmizdə layiq olduğu münasibəti görmədiyini düşündüyüm Nazim Süleymanov kimi mütəxəssislər, həmçinin digər təcrübəli və daha gənc məşqçilər var.
Ümumiyyətlə, 2015-ci ildən indiyədək PRO lisenziyası alanların siyahısında 30 məşqçimizin adı var – belə olan halda ölkənin əsas komandasının baş məşqçisi vəzifəsi əcnəbi mütəxəssisə niyə tapşırılsın ki?