“Araz Saatlı”nın baş məşqçisi maddiyatın olmamasından şikayətlənir

“Müasir futbolda maliyyə əsas şərtdir. Maddi vəsait olmaması və ya zəifliyi matçların nəticəsində də özünü əyani göstərir”.

Bu sözləri 90deqiqe.Az-a açıqlamasında “Araz Saatlı”nın baş məşqçisi Şəhriyar Məmmədov deyib.

Bölgə təmsilçisinin baş məşqçisi çox çətinliklə kubok matçına gəlib çıxmaları və oyunun gedişatı barədə də söz açdı:

“Səfər oyunlarına getmək üçün yetəri qədər maliyəmiz yoxdur. Bakıya gəlib-getməyimiz üçün avtobus 250 manat istəyir. Bu pulu da qarşılamaq iqtidarında olmadığımıza görə futbolçularım pərakəndə şəklində oyuna gəlib çıxdılar. 4 oyunçunu şəxsi maşınımla gətirmişəm, bir neçə üzvümüzü avtobusla yola salmışıq, qalanları öz hesabına gəlib oyuna özlərini çatdırıblar. Hətta qidalanmağımız üçün də maliyyəmiz çatmır. “Şəfa” ilə oyuna bir-iki saat qalmış pul atışıb ayaqüstü nələrsə yeməklə qarnımızı aldatmışıq ki, matça ac çıxmayaq. Bu qədər çətinliklərə və motivasiyamızın olmamasına rəğmən oyuna yaxşı başladıq. Görüşün 7-ci dəqiqəsində futbolçumuz rəqib qapıçını da arxda qoyub fərqlənmək istəsə də, qolkiper oyunçumuza qarşı aşkar kobudluq etdi. Amma hakimin fiti susdu. Bu da futbolçularımın ruhdan düşməsinə səbəb oldu. Meydan sahibləri fasiləyə kimi iki qol vurub paltardəyişmə otağına üstün yollandı. İkinci hissəyə bəzi taktiki gedişlər etdik. Bunun sayəsində meydanda əzm, xarakter, döyüşkənlik göstərsək də, qol gəlmədi. Saysız problemlərimizin olmasına rəğmən yetirmələrim güclü rəqibə qarşı yaxşı mübarizə apardılar. Hətta 90 dəqiqə sonra AFFA nümayəndəsi gözəl oyuna görə mənə və yetirmələrimə minnətdarlığını da bildirdi. Qısası bizim ən böyük problemimiz sponsorumuzun yoxluğudur. Maliyyə imkanlarımız yaxşılaşsa, biz lider komandaya çevriləcəyik. Çətin şəraitdə olsaq, ümidimizi itirmirik və hər oyunda meydanda mübariz oyunlarımızı keçirməyə davam edəcəyik. İnanırıq ki. əziyyətimizə, tökdüyümüz tər yerdə qalmayacaq və imkanlı iş adamları arasından komandamıza sahib çıxan biri olacaq”.

ABDULLA İSMAYILOĞLU