“Bu klub üçün oynamaq mənim üçün şərəf idi”

İngiltərə millisinin təcrübəli yarımmüdafiəçisi Cordan Henderson “Ayaks” klubundan ayrılmasını şərh edib.

90deqiqe.Az xəbər verir ki, klubun mətbuat xidmətinə danışan 35 yaşlı futbolçu ayrılıq qərarının qarşılıqlı razılaşma ilə verildiyini bildirib.

“Bu klubla bağlı olan hər kəsə dərin təşəkkürümü bildirirəm. ‘Ayaks’ın formasını geyinmək mənim üçün böyük şərəf idi. Təəssüf edirəm ki, buradakı müddətim ərzində azarkeşləri böyük uğurlarla sevindirə bilmədik. Onlar bunu sonuna qədər haqq edirlər – ən böyük titulları yenidən bayram etməyə layiqdirlər. Əminəm ki, o günlər tezliklə gələcək”

Xatırladaq ki, 2024-cü ilin yayında Niderland klubuna qoşulan Henderson “Ayaks”ın heyətində 57 oyuna çıxıb, 1 qol vurub və 9 məhsuldar ötürmə ilə yadda qalıb. O, əvvəllər “Liverpul” və “Əl-İttifaq” klublarında da forma geyinib.