UEFA İbrahimoviçlə bağlı araşdırmalara başlayır

UEFA "Milan" və İsveç millisinin hücumçusu Zlatan İbrahimoviçin mərc oyunları biznesində iştirakını araşdıracaq.

Corner.az qurumun rəsmi saytına istinadən xəbər verir ki, artıq bunun üçün xüsusi müfəttiş təyin olunub.

39 yaşlı futbolçu 2018-ci ildən özünə məxsus "Unknown AB" şirkəti vasitəsilə "Bethard" bukmeyker kontorunun səhmlərinin 10 faizinə sahiblənib. Məlumat şirkət tərəfindən də təsdiqlənib.

FIFA və UEFA-nın reqlamentinə görə, mərc oyunları ilə əlaqəsi olan futbolçular bu iki qurumun bayrağı altında keçirilən yarışlarda iştirak edə bilməz. İbrahimoviç isə "Milan"la Avropa Liqasında, yığmanın heyətində isə DÇ-2022-nin seçmə mərhələsində oynamaqla əsasnaməni pozub.

Təcrübəli oyunçunun günahı sübut olunarsa, futbolla bağlı fəaliyyətinə 3 illik qadağa qoyulacaq.

Qeyd edək ki, "Bethard" mərc oyunları şirkəti Maltada qeydiyyatdan keçib. Bukmeyker kontoru 2019-cu ildə 30 milyon avro xalis mənfəət əldə edib.