Azərbaycan çempionunun oyununda əlbəyaxa dava - VİDEO

"Araz-Naxçıvan" və Kosovonun "Ligeni" komandaları arasında futzal üzrə UEFA Çempionlar Liqasının əsas mərhələ oyununda xoşagəlməz hadisə baş verib.

Corner.az-ın məlumatına görə, insident matçın sonuncu - 40-cı dəqiqəsində yaşanıb.

Belə ki, Azərbaycan çempionunun hücumçusu Felipinyo ilə rəqib komandanın üzvü Arber Şkodra arasındakı mübahisə qəflətən əlbəyaxa davaya çevrilib və oyunçular bir-birilərinə zərbə endiriblər.

Daha sonra Kosovo təmsilçisinin digər futzalçısı Anton Uka ayağı ilə braziliyalı forvarda zərbə endirib. Digər oyunçuların müdaxiləsindən sonra tərəfləri sakitləşdirə biliblər.

Görüşün baş hakimi Kriştianu Xose Kardoso Santos davada iştirak etmiş hər 3 futzalçıya qırmızı vərəqə göstərərək meydandan qovub.

Qeyd edək ki, qarşılaşma 6:6 hesabı ilə başa çatıb.