Avropa Kuboku: Azərbaycan millisindən 4 medal

Yunanıstanın paytaxtı Afinada gənc cüdoçular arasında keçirilən Avropa Kubokunda Azərbaycan yığması 4 medal qazanıb.

Corner.az xəbər verir ki, qızıl medallara Məhərrəm İmamverdiyev (81 kq) və Kənan Nəsibov (+100 kq) yiyələnib. İmamverdiyev finalda ukraynalı Stanislav Korçemlyuka, Nəsibov isə həmyerlisi Hüseyn Məmmədova qalib gəlib.

Daha bir gümüş medalı Ruslan Nəsirli (100 kq) qazanıb.

Digər cüdoçulardan Qasım Vəlizadə (66 kq), Vüqar Talıbov (90 kq), Könül Əliyeva (48 kq) və Nərmin Əmirli (78 kq) 5-ci, Sabir İsayev (100 kq) 7-ci yeri tutub.

Bu nəticə ilə Azərbaycan yığması ümumi komanda hesabında İsrail (4 qızıl, 1 gümüş, 4 bürünc) və Türkiyədən (2 qızıl, 3 gümüş, 3 bürünc) sonra üçüncü yeri tutub.

Avropa Kubokunda 27 ölkədən ümumilikdə 300 (188 oğlan, 112 qız) cüdoçu mübarizə aparıb.