Bu gün qadın voleybolçular arasında Azərbaycan Super Liqasında 4-cü dövrənin oyunlarına start verilib. Corner.az xəbər verir ki, günün ilk görüşündə “Murov” “Azərreyl”lə qarşılaşıb.
Görüş “dəmiryolçular”ın üstünlüyü ilə başlayıb. İlk setdə 25:22 hesabı ilə qalib gələn Famil Ağayevin yetirmələri sonrakı hissələri də aktivinə yazmağı bacarıb - 25:10, 25:19. Beləliklə, “Azərreyl” 3 xalı 3:0 hesablı qələbə ilə qazanıb.
Azərbaycan Voleybol Federasiyasının idman zalında təşkil olunan 10-cu turun növbəti matçı UNEC və “Abşeron” komandaları arasında olub. Bu görüşdə də qalib 3 setdə bəlli olub. Çempionat ərzində bütün görüşlərdə qələbə qazanan Eldar Yusubovun komandası bu matçda da inamlı qələbə qazanıb. “Abşeron” ilk hissəni 25:22, sonrakı setləri isə 25:14 və 25:19 hesabı ilə qazanıb.
4-cü dövrənin ilk turundan sonra “Abşeron” 30 xalla turnir cədvəlində liderliyi davam etdirir. 17 xala malik “Azərreyl” ikinci, 8 xalla “Murov” üçüncü yerdə qərarlaşıb. Sonuncu olan UNEC-in hesabında isə 5 xal var.
