Stend atıcılığının bugünkü final yarışını Azərbaycan Respublikasının Gənclər və İdman naziri Fərid Qayıbov Bakı Atıcılıq Mərkəzində izləyib.
Corner.az xəbər verir ki, qaliblərə medalları nazir təqdim edib.
“Hazırda burada 66 ölkədən 700-dən artıq idmançı iştirak edir. Bu da dünya kuboku üçün böyük rəqəmdir. Bu turnir Azərbaycanın böyük yarışları qəbul edə bildiyinin sübutudur” – nazir jurnalistlərə açıqlamasında bildirib.
Yarışların ən yüksək səviyyədə təşkil olunduğunu qeyd edən nazir əlavə edib: “Bu idman növündə bizim adət-ənənələrimiz var. Sadəcə, bunu geri qaytarıb, inkişaf etmək lazımdır. Bunun üçün işlər görülür. Federasiya bu məsələrlə bağlı çalışır. Biz də bunu görürük”
Qeyd edək ki, Atıcılıq üzrə Dünya Kuboku Bakıda mayın 28-də start götürüb. Yarışlar iyunun 7-dək davam edəcək.
