Azərbaycanda keçiriləcək futbol üzrə UEFA Region kubokunun ilkin seçmə mərhələsinin qruplarının bütün iştirakçıları müəyyənləşib. Corner.az xəbər verir ki, Azərbaycanı 2-ci qrupda “Kolos”la (Belarus) mübarizə aparacaq Region Liqasının qalibi “Cəbrayıl” təmsil edəcək. Bu komandalar arasında oyunlar Şamaxı şəhər stadionunda baş tutacaq.
Bakıdakı “ASK Arena”da isə 1-ci qrupda mübarizə aparan “Basiani” (Gürcüstan), “Kaskelen” (Qazaxıstan) və “Tallin Zapoos” (Estoniya) klubları oynayacaq.
Qrup oyunları iyunun 23-dən 29-dək keçiriləcək. Birinci qrupdan olan komandalar bir-biri ilə bir dəfə, ikinci qrupdakı komandalar isə iki dəfə qarşılaşacaq. İyunun 29-da qrup qalibləri arasında keçiriləcək qarşılaşma onların hansı qruplara vəsiqə qazanacağını müəyyən edəcək.
