Cəbrayıl Region Kubokunda mübarizəni dayandırdı

Azərbaycanı UEFA Region Kubokunda təmsil edən “Cəbrayıl” komandası bu gün ilkin seçmə mərhələnin 2-ci qrupunda növbəti oyununa çıxıb. Corner.az xəbər verir ki, rəqib yenə Belarusun “Kolos” komandası olub. Şamaxı şəhər stadionunda keçirilən matça saat 16:00-da start götürüb.

Bu komandalar arasında ayın 24-də keçirilmiş ilk matçda “Kolos” qalib gəlmişdi – 2:1. “Cəbrayıl” növbəti mərhələyə yüksəlmək üçün bugünkü görüşdw inamlı qələbə qazanmalıydı. Əks halda Azərbaycan təmsilçisi mərhələ adlaya bilməyəcəkdi. 8 qolun qeydə alındığı matçda “Cəbrayıl” növbəti məğlubiyyətlə üzləşib. Beləcə, növbəti mərhələyə vəsiqəni “Kolos” təmin edib.

İlkin mərhələnin 1-ci qrupunda Gürcüstanın “Basiani”, Qazaxıstanın “Kaskelen” və Estoniyanın “Tallinna Zapoos” komandaları çıxış edir. Bu qrupun qalibi sabah müəyyənləşəcək. Qrup qalibləri finalda növbəti mərhələyə vəsiqə uğrunda mübarizə aparacaq. Qalib komanda əsas mərhələdə Türkiyə, Portuqaliya, Finlandiya komandasına rəqib olacaq.

UEFA Region Kuboku
İlkin mərhələ, 2-ci qrup
26 iyun

Cəbrayıl – Kolos 2:6
Qol: Məhəmməd Xəlilov, 10. Rəşad Həmidov, 30 – Mikalay Hurinoviç, 5. Sergey Lizunov, 31; 61; 77-pen. Denis Simançuk, 72. Mixail Karatkeviç, 86.
Hakimlər: David Smayts, David Qabrovets (hər ikisi Sloveniya), Paskal Hirtsel, Luka Sibelli (hər ikisi İsveçrə)
Şamaxı şəhər stadionu.