Azərbaycan Taekvondo Federasiyasının rəhbərliyi məşqçi heyəti ilə görüşdü

Azərbaycan Taekvondo Federasiyasının rəhbərliyi milli komandaların məşqçi heyəti ilə görüşüb.

Federasiyadan Corner.az-a verilən məlumata görə, qurumun vitse-prezidentləri Nağı Səfərov və Niyaməddin Paşayev, İdarə Heyətinin üzvü Vüqar Məmmədov, Nəzarət-Təftiş Komitəsinin sədri Bəxtiyar Mirzəliyevin rəhbərliyi ilə keçirilən toplantıda baş məşqçilər Məmməd Abdullayev, Səbuhi Zülfüqarov, Elnur Amanov, böyük məşqçilər Rəşad Məmmədov, Sənan Həşimov və Vurğun Cəfərov da işirak edib.

Görüşdə təlim-məşq toplanışlarının hansı səviyyədə davam etməsi, yığmalarda ümumi vəziyyətin necə olduğu, heyətlərdəki dəyişikliklər, idmançıların hansı çəkidə yarışa qatılacağı və ümumilikdə ilin sonunadək komandaların hansı turnirlərdə iştirakı müzakirə olunub.

Qeyd edək ki, gənc və yeniyetmə taekvondoçular dünya birinciliyinə, böyüklərdən ibarət milli isə Türkiyənin Konya şəhərində keçiriləcək V İslam Həmrəyliyi Oyunlarına hazırlıqlarını davam etdirir.