“AMADA tərəfindən 2022-ci ildə ümumilikdə 1456 test götürülüb”. Corner.az xəbər verir ki, bunu Azərbaycan Milli Antidopinq Agentliyinin (AMADA) direktoru Şəfəq Hüseynli ilin yekunlarına həsr edilmiş mətbuat konfransında bildirib.
Onun sözlərinə görə, bunlardan 770-i yarış müddətində, 686-sı isə yarışdan kənarda baş tutub:
“2022-ci ildə 7 antidopinq qayda pozuntusu üzrə sanksiya qərarı qəbul edilib. Boks idman növündə iki, ağırlıqqaldırmada iki, güləş, karate və kikboksinqin hərəsində bir sanksiya qərarı qəbul edilib”.
Agentlik rəhbəri bildirib ki, AMADA-nın təhqiqat şöbəsi 2022-ci ildə 382 məsələ haqqında araşdırma aparıb:
“Bunlardan 28-i antidopinq qayda pozuntusu üzrə, 43-ü məkan məlumatı xətası üzrə təhqiqatdır. O cümlədən, bu təhqiqatların 272-si dopinq nəzarəti protokolu üzrə yoxlamalar, 16-sı ifşaetmə məlumatları, 23-ü hədəfli testlər əsasında olub”.
Hüseynli il ərzində ümumilikdə 4500 nəfəri əhatə edən 47 maarifləndirmə seminarı, 10 vebinar, 12 kütləvi təşviqat tədbiri, 20 tədbir keçirildiyini xatırladıb:
“Bölgələrdə də belə tədbirlər gerçəkləşib. Burada 1300-dən artıq idmançı, məşqçi, həkim və idman müəllimləri iştirak edib”.
