Türkiyənin “Hatayspor” klubunun hücumçusu Kristian Atsunun zəlzələ zamanı qaldığı dağıntıların arasından xilas edildiyi iddia olunurdu. Lakin Türkiyə mətbuatının yazdığı son məlumatlara görə, bu iddialar təsdiqini tapmayıb.
Corner.az xəbər verir ki, araşdırmalar nəticəsində qanalı hücumçunun adının heç bir xəstəxananın qeydiyyat siyahısında olmadığı ortaya çıxıb. Klubun mətbuat xidməti də əvvəlcə bu xəbəri təsdiqləmişdi. Lakin baş məşqçi Volkan Dəmirəl və komanda yoldaşları açıqlamalarında Atsudan heç bir xəbər almadıqlarını vurğulayıblar. Futbolçunun hələ də dağıntılar altında qaldığı ehtimal edilir.
Futbolçunun meneceri Nana Sexere də ondan xəbər almadıqlarını açıqlayıb: "Klubdan Kristianın dağıntıların altından canlı çıxarıldığına dair xəbər gəlmişdi. Amma biz onun harada olduğunu hələ də bilmirik. Atsunun ailəsi üçün çətin günlər davam edir".
Klubun idman direktoru Taner Savutdan da hələ heç bir məlumat yoxdur.
