Çimərlik futbolu üzrə dünya çempionatının Avropa zonası üzrə seçmə mərhələ oyunları Bakıda keçiriləcək. Corner.az Dünya Çimərlik Futbolu Təşkilatına (Beach Soccer Worldwide) istinadən xəbər verir ki, yarış iyulun 2-dən 9-dək baş tutacaq.
Seçmə mərhələnin təqvimi də artıq açıqlanıb. Əvvəlcə 2-4 iyul tarixlərində reytinqdə ilk “12-liy”ə düşməyən komandalar qruplara bölünərək çıxış edəcəklər. 5-7 iyulda reytinqin ən güclü 12 komandasının qrup matçları olacaq. Ümumilikdə 4 komanda növbəti mərhələyə adlayacaq.
İyulun 8-də yarımfinal və pley-off, 9-da isə final və 3-16-cı yerlər uğrunda matçlar təşkil olunacaq.
Ümumilikdə seçmə mərhələnin ən yaxşı 4 komandası bu il Birləşmiş Ərəb Əmirliklərində keçiriləcək dünya çempionatına vəsiqə qazanacaq.
