21 aprel 2024. Bazar günü

Böyük İpək Yolu” beynəlxalq turniri davam edir


  • Offside
  • 09:47 27.03.2024
  • Oxunma sayı: 60
Böyük İpək Yolu” beynəlxalq turniri davam edir

Bakıda kişi və qadın boksçular arasında “Böyük İpək Yolu” beynəlxalq turniri davam edir.

90deqiqe.Az xəbər verir ki, 11 ölkənin 121 idmançısının qatıldığı yarışın üçüncü günündə Azərbaycan millisinin daha 5 üzvü mərhələ adlayıb.

67 kq-da İlqar Salahov 1/4 finalda pakistanlı Muhammad Usama ilə döyüşüb. O, ikinci raundda tam üstünlüklə qələbə qazanıb və yarımfinala yüksəlməklə yanaşı, özü üçün azı bürünc medalı təmin edib. Salahov finala gedən yolda Mehdi Amirizafarla (İran) üz-üzə gələcək.

75 kq çəkidə 2 döyüşdə Azərbaycan dueli olub. Kamran Şahsuvarlı Novruzəli Xuduyevə (30:27, 30:27, 29:28, 30:27, 30:27), Mirşərif Kazımzadə Fərhad Şeydayevə (30:27, 30:27, 30:25, 29:28, 30:27) 5:0 hesabı ilə qalib gələrək, yarımfinala vəsiqə qazanıb. Özləri üçün bürünc medalı təmin edən boksçularımız növbəti qarşılaşmasında müvafiq olaraq, Saidcamşid Cafarov və Cavohir Ummataliyevlə (hər ikisi Özbəkistan) qüvvəsini sınayacaq.

Paris-2024 Yay Olimpiya Oyunlarına lisenziyanın sahibi Murad Allahverdiyev isə finala yüksəlib. 86 kq-da rinqə çıxan boksçumuz Bekzat Tanqatardan (Qazaxıstan) güclü olub – 4:1 (27:30, 30:27, 30:27, 29:28, 29:28). O, həlledici görüşdə Xasmaqomed Cavatxanovla (Rusiya) münasibətinə aydınlıq gətirəcək.

92 kq çəkidə Alfonso Dominqes də yarımfinal döyüşündən qələbə ilə ayrılıb. Dünya çempionumuz özbəkistanlı Diyorbek Uralova 5:0 (30:27, 30:27, 30:27, 30:27, 29:28) qalib gəlib. Dominqes qızıl medal uğrunda Toqambay Sadindiklə (Qazaxıstan) qarşılaşacaq.

Sərxan Budaqovla (80 kq) Məhəmməd Abdullayev (+92 kq) isə turniri bürünc medalla bitirib. Onlardan birincisi Fazliddin Erkinboyevə (Özbəkistan) məğlub olubsa, Abdullayev 1/4 finalda zədələndiyi üçün Cahongir Zokirovla (Özbəkistan) döyüşməyib.

Qeyd edək ki, Boks Mərkəzində keçirilən yarışın dördüncü gününün döyüşləri saat 14:00-da başlayacaq. Turnirdə final görüşləri isə martın 28-də olacaq.







Offside