Azərbaycan karateçiləri Avropa çempionatında mübarizə aparacaqlar

Karate üzrə Azərbaycan yığma komandası Xorvatiyada Avropa çempionatında mübarizə aparacaq.

90deqiqe.Az Azərbaycan Karate Federasiyasının (AKF) mətbuat xidmətinə istinadən xəbər verir ki, idmançılarımız yarışın təşkil olunacağı Zadar şəhərinə yola düşüblər.

Yığma qitəmiqyaslı yarışda kumite, kata və para karate növlərində mübarizə aparacaq. Kişilərin yarışında Fərid Savadov (60 kq), Fərid Ağayev (75 kq), Turqut Həsənov (84 kq) və Murad Hacızadə (+84 kq) mükafatlara iddialıdırlar. Onlar yarışa baş məşqçi Şahin Atamovun rəhbərliyi altında yollanıblar. Komanda yarışında ölkəmizin idman şərəfini Firdovsi Fərzəliyev, Rövşən Əliyev, Hüseyn Məmmədli və Nuran Rzazadə qoruyacaqlar.

Qadınlardan ibarət yığmanın baş məşqçisi Şahin Xudaverdiyev isə 4 karateçiyə şans verəcək. Bunlar Fidan Teymurova (50 kq), Mədinə Sadıqova (55 kq), Aysu Əliyeva (61 kq) və Renata Ərəblidir (68 kq). Kata üzrə yarışda məşqçi İsmayıl Quliyev Roman Heydərov və Ramilə Heydərovaya güvənib.

Parakaratedə isə məşqçi Rənad Əliyev Emiliya Mitlinova, Ariana Mitlinova, Nihat Məmmədzadə, Vidadi Xalıqov və Eldar Əhmədova etimad göstərib.

Avropa çempionatında 2 hakimimiz ədaləti qoruyacaq. Bunlar AKF-nin Hakimlər Komitəsinin sədri Cahangir Babayev, eləcə də gənc və yeniyetmə idmançılardan ibarət yığmanın baş məşqçisi Anar Allahverdiyevdir.

Yığma yarışa AKF-nin vitse-prezidenti Rəhman Hətəmov və baş katib Qabil Sayadovun rəhbərliyi altında yollanıb.